ബ്രഹ്മാണ്ഡം എന്ന വാക്കിന്റെ അർഥം തന്നെ തിരുത്തിക്കുറിച്ച, ജീവിതത്തിൽ ഒരിക്കലും ടീവി സീരീസുകൾ കാണില്ല എന്ന് ശപഥം ചെയ്തവരെ പോലും ടിവി അടിക്റ്റ് ആക്കി മാറ്റിയ, ലോകത്ത് തന്നെ ഏറ്റവും അധികം ആരാധകരുള്ള ഫ്രാഞ്ചൈസുകളില്‍ ഒന്നായ ഗെയിം ഓഫ് ത്രോണ്‍സ് ഈ വർഷത്തോടെ അവസാനിക്കുകയാണ്. എട്ടാമത്തെയും അവസാനത്തെയും സീസൺ വരുന്ന ഏപ്രില്‍ 14 മുതൽ സംപ്രേക്ഷണം ചെയ്തു തുടങ്ങും. ഇതുവരെ ഈ സീരീസ് കാണാത്തവരെ ഉദ്ദേശിച്ചാണ് ഈ പോസ്റ്റ്. ഈ സീരിസിനെക്കുറിച്ചു ഒരുപാട് കേട്ടിട്ടുണ്ടെങ്കിലും ദൈര്‍ഖ്യം കൂടുതൽ ആയതുകൊണ്ടും അതുപോലെ എങ്ങനെ ഇത് ഡൌൺലോഡ് ചെയ്യണം എന്ന് അറിയാത്തത് കൊണ്ടും ഇങ്ങനെ പല കാരണങ്ങളാലും ഗെയിം ഓഫ് ത്രോണ്‍സ് കാണുന്നത് മാറ്റി വച്ചവർ ഉണ്ടാകും. അവർക്ക് ഈ പോസ്റ്റ് ഉപകാരപ്പെടും എന്ന് വിശ്വസിക്കുന്നു.ഇന്നത്തെ ദിവസം മുതൽ , അതായത് മാര്‍ച്ച്‌ 6 മുതൽ ഡെയിലി രണ്ട് എപ്പിസോഡ് വീതം കണ്ടാൽ എട്ടാമത്തെ സീസണിലെ ആദ്യ എപിസോഡ്  ഇറങ്ങുന്ന ഏപ്രിൽ 14 ന് മുൻപായി ഈ സീരീസിലെ ഇതുവരെ ഇറങ്ങിയ മുഴുവൻ എപിസോടുകളും കണ്ടു തീർക്കാം.

എന്താണ് ഗെയിം ഓഫ് ത്രോണ്‍സ് ജോര്‍ജ് ആര്‍ ആര്‍ മാര്‍ട്ടിന്‍ എഴുതിയ എ സോങ്ങ് ഓഫ് ഐസ് ആന്‍ഡ്‌ ഫയര്‍  പരമ്പരയിലെ നോവലുകളെ ആസ്പദമാക്കി എച്ച് ബി ഓ  പുറത്തിറക്കിയ ഒരു ടീവി സീരിസ് ആണ് ഗെയിം ഓഫ് ത്രോണ്‍സ്. 2011 മുതൽ സംപ്രേക്ഷണം ചെയ്തു തുടങ്ങിയ ഈ സീരീസ് ഇതുവരെ 7 സീസണുകളിലായി 67 എപിസോഡുകൾ പിന്നിട്ട് കഴിഞ്ഞു. ഫാന്റസി, ഡ്രാമ എന്നീ ഗണങ്ങളില്‍ പെടുത്താവുന്ന ഗെയിം ഓഫ് ത്രോൺസിന് ഇന്ന് ലോകമെമ്പാടുമായി കോടികണക്കിന് ആരാധകരാണുള്ളത്. അധികാരത്തിന് വേണ്ടി പരസ്പരം പൊരുതുന്ന ഒരുപാട് രാജവംശങ്ങളുടെ ബാക്ക്ഗ്രൗണ്ടില്‍ കഥ പറയുന്ന ഈ സീരീസ് ത്രില്ലിംഗ്  ആയ നിരവധി കഥാസന്ദർഭങ്ങൾ കൊണ്ടും വിസ്മയിപ്പിക്കുന്ന യുദ്ധരംഗങ്ങൾ കൊണ്ടും സമ്പന്നമാണ്. മരണമാസ്സ് ആയ മുഹൂർത്തങ്ങളും അതിന് മാറ്റ് കൂട്ടുന്ന കിടിലൻ വി എഫ് എക്സ് , പശ്ചാത്തല സംഗീതവുമെല്ലാമായി നൂറ് ശതമാനം എന്റര്‍ട്ടൈന്‍മെന്‍റ്  നൽകുന്ന എക്സ്പീരിയൻസ് എന്ന് തന്നെ ഇതിനെ വിളിക്കാം. കഥപാത്രങ്ങളുടെ വളര്‍ച്ച ആണ് എടുത്തുപറയേണ്ട മറ്റൊരു സവിശേഷത. സീരീസ് കണ്ടവർക്കറിയാം ചുരുങ്ങിയത് രണ്ട് കഥാപാത്രത്തോടെങ്കിലും നിങ്ങൾക്ക് ആരാധന തോന്നിയിരിക്കും.

ഏതൊരു ടിവി സെരീസിന്റെയും കാര്യത്തിൽ ബാധകമായ ചില വസ്തുതകൾ ഗെയിം ഓഫ് ത്രോണ്‍സിന്‍റെ കാര്യത്തിലും പറയേണ്ടതുണ്ട്. ഇത് ഒരു സീരീസ് ആയതുകൊണ്ട് തന്നെ ആദ്യത്തെ രണ്ടു മൂന്ന്‍ എപ്പിസോഡ് കൊണ്ടൊന്നും ഇതിനെ വിലയിരുത്തികളയരുത്. ഒരു സിനിമയുടെ ആദ്യത്തെ 5 മിനിറ്റ് മാത്രം കണ്ടിട്ട് അതിനെപ്പറ്റി അഭിപ്രായം പറയുന്നതുപോലൊരു വിഡ്ഢിത്തം ആണ് ഇതും. ഭൂരിഭാഗം പേരും ആദ്യത്തെ നാലോ അഞ്ചോ എപ്പിസോഡിൽ തന്നെ അടിക്റ്റ്  ആകും. എന്നിട്ടും ഇഷ്ടമായില്ലെങ്കിൽ കുറഞ്ഞത് ആദ്യത്തെ സീസൺ എങ്കിലും മുഴുവൻ കാണുക. എന്നിട്ട് മാത്രം ഇതിനെക്കുറിച്ച് വിധി പറയുക. ഒരു സീസണ്‍  കൊണ്ടുപോലും ഇതിന്റെ ക്വാളിറ്റിയെ അളക്കാൻ പറ്റുമോ എന്ന് സംശയമാണ്.

എന്തുകൊണ്ട് ഈ സീരീസ് കാണണം ? നിങ്ങളിൽ കുറച്ചുപേരെങ്കിലും കരുതുന്നുണ്ടാവും എന്തിന് നിങ്ങളുടെ ഡേറ്റയും ജീവിതത്തിലെ വിലപ്പെട്ട കുറച്ചു മണിക്കൂറുകളും മാറ്റി വച്ച് ഈ സീരീസിൽ ഇതുവരെ ഇറങ്ങിയ എല്ലാ എപ്പിസോടുകളും എന്തിന് കാണണം എന്ന്. അവരോട് ഒന്നേ പറയാനുള്ളു: നിങ്ങൾ ഇത് കാണാൻ ചിലവഴിക്കുന്ന ഓരോ നിമിഷവും നൂറ് ശതമാനം മുതലാണ് എന്ന കാര്യത്തിൽ യാതൊരു സംശയവും വേണ്ട. ത്രിൽ അടിച്ചു കിളി പറക്കാൻ തയ്യാറായി തന്നെ കാണാൻ ഇരുന്നോളൂ. ഈ സീരീസ് ആദ്യമായി കാണുക എന്നത് തന്നെ വലിയൊരു ഭാഗ്യമാണ്. നിങ്ങളിൽ പലരും ഫാനിസത്തിന്റെ ഭാഗമായി പ്രൊമോഷന്‍ പോസ്റ്റുകൾ ഇടുന്നവരായിരിക്കും. അതിൽ ചില വാക്കുകൾ നിങ്ങൾ ഉപയോഗിക്കാറുണ്ടല്ലോ. മരണമാസ്സ് കൊലമാസ്സ്, അടാർ ഐറ്റം എന്നൊക്കെ അതിനെയൊക്കെ യഥാർഥ അർഥം എന്താണെന്ന് അറിയണമെങ്കിൽ, ടെൻഷൻ താങ്ങാനാവാതെ ബാക്കി എപിസോഡുകൾ കാണാൻ വേണ്ടി ഊണും ഉറക്കവും പോലും ഉപേക്ഷിക്കുന്ന തരത്തിലുള്ള ഒരു അഡിക്ഷന്‍ ലെവലില്‍ വരെ എത്തി നിൽക്കണമെങ്കിൽ , ഇഷ്ട കഥാപാത്രങ്ങളുടെ ജയത്തിൽ സന്തോഷിക്കാനും ദുഃഖങ്ങളിൽ കരയാനും എതിരെ നിൽക്കുന്നവർക്ക് എട്ടിന്റെ പണി കൊടുക്കുമ്പോൾ രോമാഞ്ചം സിരകളിൽ പടർന്നു കയറി എഴുന്നേറ്റ് നിന്ന് സ്‌ക്രീനിൽ നോക്കി കൈയടിക്കാനും കൊതിക്കുന്നുണ്ടെങ്കിൽ. കേറി വാടാ മക്കളേ ഗെയിം ഓഫ് ത്രോണ്‍സിന്‍റെ ലോകത്തേക്ക്.